Weekend in Neuchâtel

Äs super luschtigs Weekend in Neuchâtel
[verfasst von Stephi Bickel] <-- merci vielmal für dini Arbeit !

Samschtig (21.02.09):
Endlich..., es isch so wiit... Ab nach Neuchatel anes internationales Turnier. JuhuiJ! Oder ghört dWeschtschwiiz doch na zude Schwiiz?! Wiä mir feschtgstellt händ eher nöd. Zu dem chömemer na spöter. Dass mir am Sunntig (Turniertag) alli gnug fiit sind und all gnueg Schlaf händ, simmer scho am Samschtig los gfahre. Okey, das mitem Schlaf lömmer mal so im Ruum stah J. Treffpunkt isch am 10ni am Bahnhof Oerlikä Nord gsi und de Tag hät scho guet agfange.... Eigentlich sött ja euse Busfahrer/Trainer Rolf es Vorbild gegenüber sinerne Spielerinne sii, aber das isch wohl nöd de Fall, denn er isch im Halteverbot gstande mitem Bus... ;-) no comment! Nachdem dSpielerinne iitrofffe sind und all na öbis zMorge go poste sind, is denn au scho los gange. Diä ganz Mannschaft hät sich riesig gfreut und isch richtig euphorisch gsi... bis zu dem Ziitpunkt, womer denn de Kim ihri super (Ironie) CD händ müsse lose, aber wenigschtens häts eis luschtigs Lied druf gha J.

Nach zwei WCs Pausene (ghat halt doch nöd anderscht) und emene luschtige Film (Stephi und Technik) simmer denn am Ziel a cho. Und wommer a cho sind... wo eigentlich so genau...?! Irgendwo in Neuchatel zwüschet Berge und imene usgstorbene „Dorf“. Sogar es Dorf isch lebendiger! Aber „Centre du sportif“, wommer übernachtet händ, isch na recht modern gsi für das „Dorf“. Nachdem mir pakiert händ, hämmer eus na müsse a melde ade Reseption. zum Glück chan ja dMili, dMartina, dMakiesa und dFerize (obwohl, dass bide Ferize niemmert denkt hät) französisch. Danke a eu alli! Und stellet eu vor, sogar Zimmerufteilig isch ii weniger als 30 Sekunde greglet sie. Und da wott na öber sege, mir Fraue sind kompliziert. Wo bitte schön?!

Nachere kurze Besichtigung und nachem Zimmerbezug is denn au scho wieder los gange Richtig Dorfkern. Alli händ en riese Hungar gha und händ unbedingt müesse öbis esse... aber nur wo...?! Da de einzigi Lebensmittellade (Denner) am Samschtig nur vom 9ni bis am 12fi offe gha hät und mir öbe so uf diä halbi 3 deht gsi sind, hämmer halt witter müsse sueche. Chönder eu vorstelle wiä mer sich da fühlt... Hungrigi Spielerinne und en Buschaufeur wo fascht am verhungere gsi sind und denn hät nüt offe ii dem Dorf und das am Samschtig Namittag. Zum Glück hät denn ä chlini Bäckerei offe gha. Äs Wunder! Deht händ denn einigi es mini-Sandwich, es ganzes Brot oder eifach öbis Süesses kauft. Aber damit isch ja de Hunger nöd gstillt gsi. Also simmer wieder zrugg ii euses „Hotel“. Aber au deht hättmer nur bis am 15:00 Uhr chöne warm esse. Und was isch echt für Ziit gsi? 15:15 Uhr. Aber zum Glück sind diä Mensche alli so nett und händ allne na ä grosse Protion Pommes gmacht und das für nur Fr. 5.- / Person. Aja, unterwegs hämmer na ä gueti Pizzeria entdeckt, wommer unter anderem am Abbig sind go Znachtesse.

Chum hämmer eusi riese Portion Pommes verschlunge sind es paar is Hallebad. Einzelni händ au es Nachmittagsschlöfli gmacht, damits denn für de Abbig fit sind. Nonig mal im Wasser hämmer scho es Problem müesse löse... das isch denn kompliziert gsi mit dene Chästli... dNadia und Stephi händ denn usversehe äs Kästli bide Herre gno anstatt bide Fraue J. Nachdem chlinere Stress händ denn ali dä Wirepool verdient... Hehe und de Rolf hät sich wiä im Himmel gfühlt... 7 Fraue mit ihm im Wirepool. Was wott denn en Maa meh. Und diä niedische Blick vode andere Manne... Das hät er so richtig gnosse... J.

Am spötere Abbig simmer denn alli ii diä Pizzaria go esse... Mhmmm, fein! DMartina isch denn au na dezue gstosse... Es isch denn än richtig lässige Abbig worde und mir sind richtig kreativ gsi... Ich ha gar nöd gwüsst, dass mir alli so guet chönd reime. Mir händ es neus Sprüchli welle erfinde und es sind es paar richtig gueti usecho und au es paar luschtigi J. Am meischte Freud hänt glaubs Restaurant selber gha... diä sind dank eus richtig rich worde a dem Tag...

Nachem feine Esse sind denn alli erschöpft is Bett gfalle und händ richtig lang gschlafe...

Mir sind alli richtig brav und vorbildlich gsi J

Oder doch nöd?! Nei also mir händ eus guet benoh, vor allem Kim.... und mir händs richtig luschtig gha. Au nachdem de Rolf is Bett isch und mir na unerwünschte Bsuech becho händ. Äs grosses Dankeschön a dKim, dMili und a dJoy.... J Aber meh wänder au nöd wüsse....


Sunntig (22.02.09):
Am nächschte Sunntig sind denn alli fit und pünktlich am Frühstückstisch gsesse (es isch ja au ums Esse gange ;-). Nachdem dNadia ihri 5 Nutellabrötli gha hät, oder sinds doch meh gsi ;-) und einigi meh vom Buffet mitgno händ als möge händ simmer denn au scho abgfahre... Naja, fahre chamer dem glaubs nöd würklich sege... eher grutscht... denn es hät diä ganz Nacht extrem afange schneie und de Unterschied zwüschet Strass und Trottoir hätmer denn au nüme erchänt.. Aber zum Glück simmer denn na über de Berg cho und händ dSandra am Bahnhof in Neuchatel mit einige Minute verspötig chöne iilade...

Aber wiä das Neuchatel usgseh hät...bide Hüser hättmer chöne meine, diä sind usem 18 Jahrhundert (alt, dreckig...) und mer hät immer gmeint, das diä Hüüser jedi Sekunde zemme gheiet... aber mir lebet alli na. Isch also nüüt passiert J.

Aber sBeschte chunt ja erst na... wemmer das glaubs nöd selber miterlebt hät, würdmer glaubs meine mir machet en Witz. Das Turnier isch irgendwo imene Dorf ufeme Berg bi Neuchatel gsi (wiä immer...). Stellet eu vor: Mir sind wegem Schnee nöd Mal dStrass deruf cho.... denn diä kennet sWort Schneerume, Schufle oder salze nöd! Das chan eifach nöd Schwiiz si! Zum Glück wohnemer alli im Kanton Züri. Mir hättet müsse ufelaufe und sZiel hätmer nämlich vo unne au nöd gseh. Und wiä das ja so isch mite Fraue. Diä meiste händ kei passendi Schueh für ä Schneewanderig a gha. Aber zum Glück hät so en nette Herr gseit, es ghit na en andere Weg mitem Auto, wo nöd so steill isch. Puhh... namal Glück gha. Aja, en Parkplatz hämmer natürlich nöd gfunde. Aber mir kennet ja langsahm de Rolf. Er parkiert eifach deht wommer nöd unbedingt dörfti J.

sTurnier selber isch au na lässig gsi... s1. Spiel gege Gumefens-Sorens 2 isch eigentlich kein schlechete Start gsi 0-0. 2. Spiel gege Court hämer denn leider unglücklich 0:1 verlohre. Mir händ aber nöd welle ufgeh und händ wiiter kämpft. Denn wemmer diä nächschte 2 Spiel gwühnet währemer 1 Rundi wiiter. Gege Racing Club Lausanne hämmer denn au gwunne 2-0. Beidi Goal hät dFerize gmacht innerhalb vo 1 Minute (jetzt chunt euse Goalspruch J). Am Schluss is denn namal richtig spannend worde, aber mir händ wiiter kämpft und händ sResultat chöne bhalte. SLetschte und dä alles entscheidene Matsch isch gege Xamas gsi (am Rolf sini 2. Lieblingsmannschaft. Natürlich nach eus ;-)). Xamax spielt ii de 2. Liga und hät bis jetzt jedes Spiel gwunne. Mir sind voll motiviert gsi und händ eifach welle gwünne. Hät ebe guet töhnt, wenn’s alli Spiel gwünnet nur gege Züri Nord nöd, hehe J. Mir händ alli namal de Druck erhöht und händ super kämpft. Au gueti Goalchancene hämmer gha, nur leider keine verwertet. So is denn bim 0-0 blibe. Uf ei Art sind alli entdüscht gsi, aber jedi hät gwüsst, dass es im Grosse und Ganze äs guets Resultat gsi isch. Mir händ eusi Leistig namal chöne steigere und händ Wille und Kampfgeischt zeigt. Und am wichtigschte: Mir sind ei Einheit gsi und händ viel Spass gha!

sTurnier isch für en wolltätige Zweck gsi. Jedi Mannschaft hät chöni alti Sache bringe, egal was. Muss eifach alles zum tschutte gha. Diä Sache sind denn uf Afrika gange, dass diä Mensche, wo nöd so viel Geld händ au chönd Fuessball spiele. Und wiä chas anders sie, Züri Nord hät natürlich am meiste mitbracht. Es ghats halt glich nöd ohni Züri Nord und em Ford oder doch eher mit Mord J

Allgemein isch das äs super lässigs Weekend gsi. Mir händs alli super zemme gha und chönds chum erwahrte bis es wieder äs nächscht Erlebnis isch.

Und de kröhnendi Abschluss isch natürlich de Bsuech im MC Donalds gsi. Au Spitzesportlerinne münd sich Mal öbis gönne J. Aber mir händ alli nöd zviel gesse, mir münd ja na uf eusi Linie achte J.

Grüessli, 1. Mannschaft Fraue FC Züri Nord

Sandra, Maria (C), Stephi, Nadia, Makiesa, Ferize, Mili, Hani, Joy, Martina, Kim und de Rolf

<< zurück